第二場（磨劍山莊出便，台左；台後展示一片湖光山色。姚妻從屋內上。）

姚妻：（獨白）黃昏咯；棵杉樹都黑哂，山上棵松樹灰灰暗暗，十足黑羅剎咁；天陰陰，係牛郎都知要返歸喇。但係我牛郎今日去邊呢？而今應該聽見佢樹林邊吹響號角，同埋牛鈴叮叮噹噹聲咯噃。（有個妹仔從台左上。）天黑咯，重未見牛。

 

妹仔：今日成日都烏雲密佈，或者牛郎分唔到日頭同夜晚呢。

 

姚妻：可能佢唔忿氣第一日幫我看牛就畀我整蠱，佢饅頭入面放石頭。

 

妹仔：佢咁口臭，都抵死啦。咦，個靡高魯泉？（高魯泉上，台右。）

 

高魯泉：姚夫人，我北方大美人，你好呀！

 

姚妻：你由樹林返嚟，有冇見到我啲牛同埋個牛郎古劍寒呀？

 

高魯泉：個牛郎重狼過華秀隻狗。佢好似同樹林啲野獸夾埋劏哂你啲牛。

 

姚妻：死火，高魯泉，你講到好似好大鑊咁噃。

 

高魯泉：直頭杰達達呀。

 

姚妻：你見到乜呀？




高魯泉：啲狼生吞你啲寶貝牛囉。

 

姚妻：喂，呢啲嘢唔講得笑嘅噃。

 

高魯泉：好快你就知我唔係講笑㗎啦。你見啦，天黑啦，雖然重有太陽，但係好快就會落山，而你啲牛連影都重未見。

 

姚妻：唔通你講嘅係真嘅？求神庇佑！你係咪話我啲牛畀狼吞哂。

 

高魯泉：一隻都冇得剩吖。

 

妹仔：但係當時個牛郎在場嘅，係唔係？ 啲狼襲擊啲牛個陣，佢究竟响邊？

 

高魯泉：咩企响附近繑埋手，陰陰咀笑囉。如果當時佢肯同我一齊去救啲牛嘅話，而今應該重有好多隻條尾揈揈吓。條木咀郁都唔郁，剩係响度冷笑我講嘅每一句說話。個班野獸多到數唔哂，我唔夠膽一個人行埋去，唯有企响旁邊睇住啲牛畀佢撕成碎片。我嬲起上嚟咩擘大喉嚨媽叉佢祖宗十八代，重想迫佢出手，好在及時發現佢好打過我幾十倍。講你都唔信吖，佢一嘢將具大石舉過頭，真係過哂頭，然之後兜頭兜面向我掟埋嚟，好在我走得快咋，如果唔係呀……

 

姚妻：咁我啲牛即係冇哂啦，係唔係呀？

 

高魯泉：又難怪你咁㷫，咁大堆牛全部死清光喎; 冇計啦。

 

妹仔：喺邊度發生嘅呢？

 

高魯泉：距離呢度至少有九里路，就响草原嗰度。

 

姚妻：佢一定好嬲先至會趕到啲牛咁遠 。

 

妹仔：如果你講詒話，你就——-

 

高魯泉：如果我有半句詒話，就請莊主用佢嘅大鎚撘扁我個頭。(古劍寒把聲由右邊傳來。)牛郎返嚟啦，但係啲牛呢？

 

姚妻：衰人，我啲牛呢？我啲牛去咗邊呀？(向右衝過去)

 

高魯泉：夫人，做吓好心，千祈咪爆我出嚟呀，如果唔係，佢實攞我命啫。大姐仔，你都係呀，千祈咪咪話係我㧻佢背脊嘅，佢唔係人咁品㗎，郁一隻手指咋，就可以擳死你同埋我啦。佢嚟喇，等我匿埋先。

 

妹仔：高魯泉，你都算勇囉！

 

高魯泉：照我講去做啦，妹！千祈咪爆響口吖！（下，台左。古劍寒同姚妻上，台右。）

 

古劍寒：掂哂。

 

姚妻：我啲牛去咗邊？你好講囉喎！

 

古劍寒：响樹林入面漫遊緊，不過唔係用自己隻腳啫。

 

姚妻：咪轉彎抺角喇！

 

妹仔：你梗係好耐未試過籐條炆豬肉定呢！

 

姚妻：我啲寶貝乳牛呢？

 

古劍寒：畀啲狼用個肚載住週圍走，車費全免。

 

 姚妻：佢哋死咗？！

古劍寒：一隻不漏。

姚妻：賊牛郎！