古夢龍：關你屁事。

 

古劍寒：我想知一個人值幾多。

 

古夢龍妻：(响門口)我收咗五把刀，賣斷你呢個可憐蟲。

 

古劍寒：真係唔識貨。

 

姚鐵心：執包袱走啦。

 

古劍寒：放心，我會跟你走。你哋使唔使檢查吓？嗱，我嘅衣箱、工具箱、銀包喺哂度。插喺我條皮帶呢把刀係我老豆畀我，亦都係我喺呢個世上唯一財產。我會好似隻狗咁跟住你。(對夢龍話。) 我走啦，但係我會再見，我未返嚟報答你之前，你晚黑千祈唔好瞓得咁腍呀。

 

古夢龍：走啦，以後都靡返嚟。

 

古劍寒：始終有一日我會返。

 

姚鐵心：行啦，口水多過茶﹗(下。)

 

古劍寒：嚟啦。(下)

 

古夢龍：死仔講有骨嘅，攪到我個心囉囉孿，以後晚黑要瞓得好都幾難。條友始終都係我心腹大患。(下，入屋。)

 金毛：阿劍走咗，我以後可能冇機會再見。一個賣，一個留返低，至少暫時

嚟講，皆因肉隨砧板上，怨都無謂，唯有慢慢適應，過一日得一日。(高魯泉上。)

 

高魯泉: 喂!

 

金毛: 高魯泉?! 你隻鷹點吖?

 

高魯泉: 唔好講隻鷹啦，你估我頭先見到咩吖?

 

金毛: 講啦。

 

高魯泉: 畀你知道，你又會點做呢?

 

金毛: 都唔知你噏乜。關邊個事?

 

高魯泉: 至少關三個人事：古國華、古劍寒、同埋古夢龍。

 

金毛: 你見到古國華老爺隻鬼?

 

高魯泉: 唔係佢隻鬼，係佢個人呀。佢生勾勾，重生猛過你同我，重有佢老婆呀，佢哋重有兩個女添吖。

 

金毛: 你點解會咁講?

 

高魯泉: 我親眼見到囉。

 

金毛: 你响邊度見到佢?

 

高魯泉: 哦，我唔覺意聽見佢傾偈。當時佢坐湖邊，講起光陰似箭，好掛住個仔古劍寒，佢哋以為阿劍經已死。我好愕然，不過好快就認出佢係古國華同佢夫人。如果我有半句詒話，就切個頭落嚟畀你當凳仔坐。

 

金毛：但係佢見你唔到？

 


高魯泉：我唔係傻。佢地會跟住我，殺我滅口。

 

金毛：(暗道)都有可能。(大聲) 但係你諗住點做﹖

 

高魯泉：話畀阿劍同古夢龍聽囉。

 

金毛：阿劍已經唔再係古夢龍人；佢賣畀另一個主人。

  

高魯泉：妖﹗但係古夢龍應該知道呢件事。

 金毛：呢件事唔准你向任何人洩露半句，包括阿劍在內。等我查清查楚先，如果

你講係真，我識點做，但係你唔可以出聲。

 

高魯泉：只不過……