古夢龍妻：（由入邊出）姚莊主有禮。歡迎歡迎。 古夢龍：等我諗先。呀，掛住講，都唔記得請你入內堂飲茶添，請請。(古夢龍，姚鐵心同古夢龍妻下。古劍寒上，將膊頭上斧頭掟落地。) 古劍寒︰（獨白）我砍完樹返啦，但係咁又點。但願所有樹都係同一棵樹，所有斧頭都係同一把斧頭，咁我就可以揈行把斧頭，將個棵天咁高橡樹一劈低。我今日熱血沸騰，一諗起亞叔就腦交戰。古夢龍，我忍你重要忍到幾時？快啦，我已經苦練咁多年，武功好快就可以超過你，到時一定要搵你報殺我全家血海深仇！你殺我父母，令佢個仔變成孤兒，重將耻辱記號焫落佢額頭度。（指住自己額頭；金毛上。）呀，我死黨金毛啦。金毛！ 金毛：咩料？ 古劍寒：見唔見呢個印？ 金毛︰你又見唔見到呢個印，正我額頭中間咿牙鬆弶？你個都好，高上去，畀頭髮遮住，但係我個就似足隻牛對眼中間粒白點。 古劍寒：只要重有人類一日，我就會畀呢隻雞爪煎熬，就算落到陰曹地府都走唔甩。 金毛：我係奴隸，註定要披枷帶鎖。 古劍寒︰冇可以鎖得住我，金毛。但係點解佢殺我全家日唔殺埋我？真係希望我都做埋劍底亡魂。金毛：或者古夢龍唔想再見血，你記唔記得當日幾恐怖？ 古劍寒：陣我得大人膝頭咁高。當年兩兄弟鬥過你死我活，真係日月無光。 金毛：係古夢龍首先播落不和種子，然後粒種子好似野草一樣漫延，攪到刀光劍影，血流成河。終於，古夢龍同佢馬仔突襲老爺間屋，見人就殺。冇錯佢放我一條生路，但係就迫我做牛做馬，生不如死。重記唔記得佢打到火紅火綠之際，你做過乜？ 古劍寒：唔記得。 金毛：佢打到最燦爛之際，你揈甩奶奶隻手，衝入戰場核心，老爺就正 度，條命凍過水，你未埋到去刀劍度就跣腳昏低。 古劍寒：陣我已經一隻腳䟕落陰司路，但係個天偏偏拉返我上，要我睇住個兇手將來點死。我發過誓，一定要報仇雪恨，手刃仇人。我要佢全家死絕，燒到渣都冇；我要夢龍山莊變成廢墟，剩低烏鴉度嗌。

金毛：唔好再講烏鴉啦。諗起都心寒。 古劍寒：你聽見烏鴉叫會成身震？ 金毛：，大家一場兄弟，唔怕同你講。我殺人。 古劍寒：你講咩呀？覺得點呀？