湖海恩仇錄

芬蘭文學泰斗亞歷詩．姬維原著

                                                   曾焯文博士粵文翻譯

第一幕

 

（台右夢龍山莊，後面係鄉村景色。古夢龍同烏蠅台右上。)

 

 

古夢龍︰今日一切都好順利吓，但係你知唔知古劍寒而今邊？做緊乜呢？

 

烏蠅：砍緊樹囉。

 

古夢龍︰我今朝派你去目的靡就係睇佢砍成點囉。佢點舞把斧頭？

 

烏蠅：成個狂人咁款。我離遠住佢好似切西瓜咁劈松樹。

 

古夢龍：松樹？！我叫佢去山腳斬矮樹唔係斬松樹喎！

 

烏蠅：嗯，我見佢最高松樹中間搏命揈，樹一棵棵低，樹皮一具具周圍飛，十足燒紅鐵彈出火花一樣；佢望住松樹一聲跌落地，對眼發哂光。但係突然間停落，將把斧頭插樹墩度，吹一輪口哨，然之後開始媽媽聲。媽臭全人類，上天落地，最後靜落，企度瞪住塵，粒聲都唔出。咁我就走。

 古夢龍：佢就係咁做啦，一味有破壞，冇建設，經常成肚火，過焫雞。直

 

           頭係魔星托世，望都望佢唔好繼續亂。

 

烏蠅：我走先啦，條友唔係人咁品。（下，古夢龍妻上。）

 

古夢龍妻：又試起口面，呢段婚姻可以捱多幾耐，我都未敢樂觀。

 

古夢龍：衰婆，如果你知道發生乜事，就唔會怪我口面。

 

古夢龍妻：你唔講我又點知喎。 


古夢龍：我有個夢硬係揮之不去。

 

古夢龍妻：你夢見咩唧？

 

古夢龍：我夢見我行緊婚禮。鑼鼓喧天，古劍寒後園砌熊熊爐火，大家圍住跳舞燒食。

 

古夢龍妻：幾好，冇乜唔妥呀。

 

古夢龍：聽我講埋先。好多賓客賀我，不過我就掛住大佬古國華同佢老婆，收尾先醒起佢經已不在人世，

                十幾年前經已畀我送上路。

 

           

 古夢龍妻：佢咎由自取。希望佢安息啦，你大佬同大嫂。只要佢重有一口氣，我都冇一刻安寧。佢長眠之後，我真

                     係一身鬆哂。

湖海恩仇錄 版次：2005年12月初版 

原著：亞歷詩，姬維

翻譯：曾焯文

設計：廖仕强

排版：藍馬柯式印務有限公司

譯事資助：芬蘭文學資訊中心 

©國際演藝評論家協會（香港分會）版權所有，本書任何部份未經版權持有人許可，不得翻印、輚載、翻譯或演出